Andi Garcia
Matapos ang 32-oras na paghahanap, natagpuan ang mga debris ng nawawalang Cessna 340 sa Barangay Quirangay, Albay. Gayunman, hindi pa rin alam ang kinaroroonan ng piloto na si Captain Rufino James Crisostomo, Jr., kasama ang crew member na si Joel Martin at mga Australyanong pasahero na sina Simon Chipperfield at Karthi Santanan.
Ayon sa Camalig Municipal Disaster Risk Reduction and Management Office, iniimbestigahan ng Philippine Air Force kung malapit sa bunganga ng Bulkang Mayon bumagsak ang eroplano. Sinabi ni Camalig MDRRMO Public Information Officer Tim Lawrence Florence na sakaling bumuti ang lagay ng panahon, maaaring magpatuloy ang PAF sa pagsusuri ng lugar kung saan bumagsak ang eroplano.
Samantala, ipinag-utos ni Camalig Mayor Carlos Baldo na bumalik muna ang mga rumesponde na naglakad papunta sa lugar dahil malapit ito sa bunganga ng bulkan.
“Kung hindi ako nagkakamali, ang lugar ay hindi abot ng dalawang kilometro mula sa bunganga ng Bulkang Mayon. Dahil nasa Alert Level 2 pa rin tayo at napakalikot ng bulkan, puwedeng magkaroon ito ng pagsabog anumang oras,” pahayag ng alkalde.
“Bawal pumasok sa eksaktong lugar ng pagbagsak dahil sa hindi normal na aktibidad ng Bulkang Mayon,” dagdag ni Florence.
Nagbiyahe ang Cessna plane mula sa Bicol International Airport patungong Maynila noong Sabado ng alas-6:43 ng umaga bago ito nawala. Sa isang pahayag, sinabi ng isang tagapagsalita ng kumpanyang pang-eroplano na “Malapit kaming makipag-ugnayan sa mga awtoridad upang malaman pa ang karagdagang impormasyon tungkol sa pangyayari at magbibigay ng mga update sa lalong madaling panahon.”
